هَلْ تَنْسَى الْمَرْأَةُ رَضِيعَهَا فَلَا تَرْحَمَ ابْنَ بَطْنِهَا؟ حَتَّى هَؤُلاَءِ يَنْسَيْنَ، وَأَنَا لَا أَنْسَاكِ (إش ٤٩: ١٥)
أشعياء ٤٩ — اليوم يوم خلاص
المقدمة
ربنا بيقول لنا إن وقت الخلاص هو «الآن»، مش بكرة، وإن الطريق معاه مش معناه إن الصعوبات هتختفي، لكن معناه إن هو هيكون مصدر قوتنا ومرعانا وسطها. في الحلقة دي بنتأمل في دعوة ربنا لينا إننا نقبل الخلاص ونمشي وراه كل يوم، حتى وسط البرية والظروف الصعبة، ونفتكر إن محبته لينا ثابتة، حتى لما نحس إنه نسينا.
في هذه الحلقة
معنى «الآن وقت مقبول، الآن يوم خلاص»، وليه ما ينفعش نأجل استجابتنا لصوت ربنا.- إزاي نحتاج كل يوم نعمة وقوة تكفينا حرب النهارده، بدل ما نعتمد على قوتنا القديمة.
- الفرق بين اختفاء الصعوبات من حياتنا وبين وجود ربنا اللي يهدينا وسطها.
- إزاي الجبال والصعوبات اللي بنواجهها ممكن تتحول لطريق يقربنا من ربنا وينمّي علاقتنا بيه.
- الخلاص مش مجرد قرار لحظي، لكنه اختيار مستمر إننا نتبع المسيح ونمشي معاه.
- تعزية ربنا لشعبه: حتى لو الأم نسيت رضيعها، أنا لا أنساك، وعلى كفي نقشتك.
التفريغ الكامل للحلقة
مساء الخير وأهلاً بكم في حلقة جديدة من عيش وملح، مكملين مع بعض سفر أشعياء، والنهارده هنكمل مع بعض إصحاح ٤٩.
هنقرأ مع بعض من أول آية ٨، بتقول:
«هكَذَا قَالَ الرَّبُّ: فِي وَقْتِ الْقَبُولِ اسْتَجَبْتُكَ، وَفِي يَوْمِ الْخَلاَصِ أَعَنْتُكَ، فَأَحْفَظُكَ وَأَجْعَلُكَ عَهْداً لِلشَّعْبِ».
هاخدكم بعد كده لكورنثوس الثانية، إصحاح ٦، بتقول:
«فَإِذْ نَحْنُ عَامِلُونَ مَعَهُ نَطْلُبُ أَنْ لاَ تَقْبَلُوا نِعْمَةَ اللهِ بَاطِلاً، لأَنَّهُ يَقُولُ: فِي وَقْتٍ مَقْبُولٍ سَمِعْتُكَ، وَفِي يَوْمِ خَلاَصٍ أَعَنْتُكَ. هُوَذَا الآنَ وَقْتٌ مَقْبُولٌ. هُوَذَا الآنَ يَوْمُ خَلاَصٍ».
كمان مكتوب في مزمور ٩٥:
«هَلُمَّ نَسْجُدُ وَنَرْكَعُ وَنَجْثُو أَمَامَ الرَّبِّ خَالِقِنَا. لأَنَّهُ هُوَ إِلَهُنَا وَنَحْنُ شَعْبُ مَرْعَاهُ وَغَنَمُ يَدِهِ. الْيَوْمَ إِنْ سَمِعْتُمْ صَوْتَهُ فَلاَ تُقَسُّوا قُلُوبَكُمْ».
كل الآيات دي بتشير ليوم الخلاص، وقت مقبول. وده اللي ربنا تممه على الصليب وبالقيامة. الدور بقى جه علينا إننا نقبل الخلاص ده، نقبل الهدية.
عشان كده في عبرانيين بيقول: «اليوم إن سمعتم صوته فلا تقسوا قلوبكم». اليوم، مش بكرة. ما تأجلش.
خليني أقرا معاكم الجزء ده من عبرانيين، موجود في إصحاح ٣، هنقرا من أول آية ١٢، بتقول:
«اُنْظُرُوا أَيُّهَا الإِخْوَةُ أَنْ لاَ يَكُونَ فِي أَحَدِكُمْ قَلْبٌ شِرِّيرٌ بِعَدَمِ إِيمَانٍ، فِي الاِرْتِدَادِ عَنِ اللهِ الْحَيِّ، بَلْ عِظُوا أَنْفُسَكُمْ كُلَّ يَوْمٍ، مَا دَامَ الْوَقْتُ يُدْعَى الْيَوْمَ، لِكَيْ لاَ يُقَسَّى أَحَدٌ مِنْكُمْ بِغُرُورِ الْخَطِيَّةِ. لأَنَّنَا قَدْ صِرْنَا شُرَكَاءَ الْمَسِيحِ، إِنْ تَمَسَّكْنَا بِبَدَايَةِ الثِّقَةِ ثَابِتَةً إِلَى النِّهَايَةِ».
«إِذْ قِيلَ: الْيَوْمَ إِنْ سَمِعْتُمْ صَوْتَهُ فَلاَ تُقَسُّوا قُلُوبَكُمْ».
لفت انتباهي قوي تعبير «الارتداد عن الله الحي»، وبعدها «بل عظوا أنفسكم كل يوم ما دام الوقت يدعى اليوم».
كان بيأكد على فكرة إن دلوقتي، ما تأجلش لبكرة. وكمان فكرة «كل يوم»، كأن أنا كل يوم محتاج آخد قوة ونعمة من ربنا تكفي حرب النهارده. مش أنا زمان كنت جامد قوي؛ لأ، خليك في النهارده.
ونكمل في أشعياء، بيقول:
«قَائِلاً لِلأَسْرَى: اخْرُجُوا. لِلَّذِينَ فِي الظَّلاَمِ: أَظْهِرُوا. عَلَى الطُّرُقِ يَرْعَوْنَ، وَفِي كُلِّ الْهِضَابِ مَرْعَاهُمْ. لاَ يَجُوعُونَ وَلاَ يَعْطَشُونَ، وَلاَ يَضْرِبُهُمْ حَرٌّ وَلاَ شَمْسٌ، لأَنَّ الَّذِي يَرْحَمُهُمْ يَهْدِيهِمْ، وَإِلَى يَنَابِيعِ الْمِيَاهِ يُورِدُهُمْ».
«وَأَجْعَلُ كُلَّ جِبَالِي طَرِيقاً، وَمَنَاهِجِي تَرْتَفِعُ».
أخدتوا بالكم إنه قال: «على الطرق يرعون»؟ الطريق، الطريق اللي هو اتقال عليه قبل كده إنه لما بيقع عليه البذر مش بيلاقي أصلاً مكان يعمل فيه جذور. بس برغم من كده، هو ده المكان اللي هم هيلاقوا فيه مرعى.
«ولا يجوعون ولا يعطشون» مش معناها إن الإحساس ده مش موجود، أو إن الاحتياج ده مش موجود.
لا يضربهم حر ولا شمس. الشمس موجودة، والحرارة بتاعتها موجودة، بس مش هتضربهم، لأن الذي يرحمهم يهديهم وإلى ينابيع المياه يوردهم.
بالضبط زي ما قال: «في العالم سيكون لكم ضيق، ولكن ثقوا، أنا قد غلبت العالم».
المرعى والحرية دي مش بسبب إن الظروف كانت كلها كويسة، بس بسبب تاني: بسبب إنه هو اللي بيهديهم وإلى ينابيع المياه يوردهم.
في آية معزية قوي في المزامير، في مزمور ٨٤، تقول:
«طُوبَى لأُنَاسٍ عِزُّهُمْ بِكَ. طُرُقُ بَيْتِكَ فِي قُلُوبِهِمْ. عَابِرِينَ فِي وَادِي الْبُكَاءِ يُصَيِّرُونَهُ يَنْبُوعاً. أَيْضاً بِبَرَكَاتٍ يُغَطُّونَ مُورَةَ. يَذْهَبُونَ مِنْ قُوَّةٍ إِلَى قُوَّةٍ».
هو ده بالضبط اللي أشعياء كان بيتكلم بيه. مش بس بيتكلم عن حرية من سبي، لكن بيتكلم عن حرية من نوع تاني خالص، حرية هيديها لنا المسيح.
نصرة فوق الصعاب. وعشان كده بيقول: «وأجعل كل جبالي طريقاً». الجبال اللي في حياتنا دي، اللي احنا بنبقى متضايقين منها قوي، ونفسنا إنها تتشال، ونفسنا ربنا يزيل عننا كل التعب والألم، هي دي هتبقى الطريق للملكوت، كأنها خطوات بتقربنا وبتكبرنا أكثر في علاقتنا بربنا.
وهنا عايزة أأكد على حاجة: وقت القبول ويوم الخلاص مش معناه إن أنا أقول: أنا خلاص، أنا النهارده قبلت المسيح، أنا كده تمام.
يوم الخلاص ده اليوم اللي المسيح تمّم فيه خلاص البشرية، واتصلب وقام من الموت.
بس هو مش زرار، هو قرار. هو مش زرار أنا دوست عليه، فأنا كده خلاص داخل الملكوت. لكنه قرار إن أنا هتبعه، وإن أنا همشي بقى في الطريق الصعب ده، بس أنا واثقة إنه معايا.
واثقة إنه مع إنه طريق صعب، بس أنا هلاقي فيه مرعى. واثقة إن أنا المفروض هجوع وهعطش قوي، بس هو بيقول لي مش هتجوع ومش هتعطش، عشان هو قال إنه يهديهم إلى ينابيع المياه.
وبيكمل أشعياء، كأنه بجد إحنا اللي بنرد، بيقول:
«وَقَالَتْ صِهْيَوْنُ: قَدْ تَرَكَنِي الرَّبُّ، وَسَيِّدِي نَسِيَنِي».
وحط بقى بدل صهيون كل حد يحط اسمه، وكأنه هو ده بجد حالنا وكلامنا اللي بنقوله في الوقت الصعب: إن ربنا نسينا.
وبعدين يرد بقى ربنا:
«هَلْ تَنْسَى الْمَرْأَةُ رَضِيعَهَا فَلاَ تَرْحَمَ ابْنَ بَطْنِهَا؟ حَتَّى هؤُلاَءِ يَنْسَيْنَ، وَأَنَا لاَ أَنْسَاكِ. هُوَذَا عَلَى كَفِّي نَقَشْتُكِ. أَسْوَارُكِ أَمَامِي دَائِماً».
حبه فينا، هو ناقش أسامينا على كفيه.
«وأسوارك أمامي دائماً»، كأنه بيحوط علينا، وإن حمايتنا دي حاجة هو على طول باصص عليها.
الإصحاح ده بيفكرنا بعمل ربنا في حياتنا، وعمل المسيح على الصليب وفدائه لينا.
هو كمان رسالة تعزية لكل حد بيعدي بوقت حاسس إنه صعب، زي البرية. بيوعد إنه في الوقت الصعب ده هيكون هو ينبوع المية، وبيوعد إن في يوم للخلاص، مهما طال الوقت، ومهما قلنا إنه نسينا.
وتاني بيأكد في نهاية الإصحاح، بيقول:
«فَتَعْلَمِينَ أَنِّي أَنَا الرَّبُّ الَّذِي لاَ يُخْزَى مُنْتَظِرُوهُ».
أشوفكم الحلقة الجاية.
أسئلة الحلقة
١. ليه الكتاب بيأكد على كلمة «اليوم» في دعوة الإنسان لقبول الخلاص؟ وإيه اللي ممكن يخلينا نأجل استجابتنا لصوت ربنا؟
٢. إزاي نقدر نعيش وسط الصعوبات من غير ما ننتظر إنها تختفي، وإحنا واثقين إن ربنا هو اللي بيهدينا وينقلنا من قوة إلى قوة؟
٣. إيه الفرق بين إن قبول الخلاص يكون مجرد لحظة، وبين إنه يبقى قرار يومي إننا نتبع المسيح؟
٤. هل مرّيت بوقت حسيت فيه إن ربنا نسيك؟ إزاي بتفكرك آية «على كفي نقشتك» بمحبته ليك؟
آيات مرتبطة بالحلقة
أشعياء ٤٩: ٨
«هَكَذَا قَالَ الرَّبُّ: فِي وَقْتِ الْقَبُولِ اسْتَجَبْتُكَ، وَفِي يَوْمِ الْخَلاَصِ أَعَنْتُكَ، فَأَحْفَظُكَ وَأَجْعَلُكَ عَهْداً لِلشَّعْبِ».
كورنثوس الثانية ٦: ١ – ٢
«فَإِذْ نَحْنُ عَامِلُونَ مَعَهُ نَطْلُبُ أَنْ لاَ تَقْبَلُوا نِعْمَةَ اللهِ بَاطِلاً، لأَنَّهُ يَقُولُ: فِي وَقْتٍ مَقْبُولٍ سَمِعْتُكَ، وَفِي يَوْمِ خَلاَصٍ أَعَنْتُكَ. هُوَذَا الآنَ وَقْتٌ مَقْبُولٌ. هُوَذَا الآنَ يَوْمُ خَلاَصٍ».
عبرانيين ٣: ١٢ – ١٤
«اُنْظُرُوا أَيُّهَا الإِخْوَةُ أَنْ لاَ يَكُونَ فِي أَحَدِكُمْ قَلْبٌ شِرِّيرٌ بِعَدَمِ إِيمَانٍ، فِي الاِرْتِدَادِ عَنِ اللهِ الْحَيِّ، بَلْ عِظُوا أَنْفُسَكُمْ كُلَّ يَوْمٍ، مَا دَامَ الْوَقْتُ يُدْعَى الْيَوْمَ، لِكَيْ لاَ يُقَسَّى أَحَدٌ مِنْكُمْ بِغُرُورِ الْخَطِيَّةِ. لأَنَّنَا قَدْ صِرْنَا شُرَكَاءَ الْمَسِيحِ، إِنْ تَمَسَّكْنَا بِبَدَايَةِ الثِّقَةِ ثَابِتَةً إِلَى النِّهَايَةِ».
مزمور ٨٤: ٥ – ٧
«طُوبَى لأُنَاسٍ عِزُّهُمْ بِكَ. طُرُقُ بَيْتِكَ فِي قُلُوبِهِمْ. عَابِرِينَ فِي وَادِي الْبُكَاءِ يُصَيِّرُونَهُ يَنْبُوعاً. أَيْضاً بِبَرَكَاتٍ يُغَطُّونَ مُورَةَ. يَذْهَبُونَ مِنْ قُوَّةٍ إِلَى قُوَّةٍ».
أشعياء ٤٩: ١٣ – ١٦
«تَرَنَّمِي أَيَّتُهَا السَّمَاوَاتُ، وَابْتَهِجِي أَيَّتُهَا الأَرْضُ، وَلْتَكْسِرِ الْجِبَالُ بِالتَّرَنُّمِ، لأَنَّ الرَّبَّ قَدْ عَزَّى شَعْبَهُ، وَعَلَى مَذْلُولِيهِ يَرْحَمُ. وَقَالَتْ صِهْيَوْنُ: قَدْ تَرَكَنِي الرَّبُّ، وَسَيِّدِي نَسِيَنِي. هَلْ تَنْسَى الْمَرْأَةُ رَضِيعَهَا فَلاَ تَرْحَمَ ابْنَ بَطْنِهَا؟ حَتَّى هؤُلاَءِ يَنْسَيْنَ، وَأَنَا لاَ أَنْسَاكِ. هُوَذَا عَلَى كَفِّي نَقَشْتُكِ. أَسْوَارُكِ أَمَامِي دَائِماً»
